Nang Bakisah: Amang Isap

Samingguan ngini bilang hujan aja hari, tarahat malam pang hujannya. Nang katuju malandau bilang kada sing pisahan wan tapih di awak. Tagal mun bubuhan nang bagawian di kantur nyata haja kada kawa mamadar. Ma warung sungsung tu pang nang dipaulah.

“Sungsungnya Nang ikam tulak bagawi..,” jar Nanang Akin malihat Anang Tupai babaju bagawi duduk di warungnya.

“Kabalujuran haja Kin nai. Mama ku di rumah lagi mamuntungi ading ku nang kada sing bangunan. Dari pada ta palit-palit baik aku turun basungsung,” jar Tupai lajur mamasan kupi panas.

“Kabalujuran jua nah, bini ku sungsung maulah gaguduh lawan untuk. Nyaman banar panas-panas..,” jar Akin sambil manyurung ka wadai.

Kada saapa datangan bubuhannya macam Nanang Abay, Utuh Kumandrah lawan Anang Aspal.

“Napa hajat nih, lakun nang bajanjian tu sungsung ma warung..,” jar Akin.

“Ha ha ha….dari pada dimuntungi bini basungsungan hari baik turun basungsung..,” jar Abay.

“Ikam jua Kin lah lakun manahu basungsung jua basadia wadai panas-panas..,” Kumandrah nang basuara.

Asik bubuhannya bapanderan sambil mancacap gaguduh ka banyu hanyar manyuap. Muncungul Badut basapida mutur hanyar handak tulak ka sakulah. Biasa mun handak tulak sakulah Badut ni basalaman dahulu lawan abah, mama lawan kakanya.

“Bah sakalinya ma warung sidin, ulun maka am dimamai mama di rumah..,” jar Badut malihat Anang Tupai ma warung.

“Napa garang tahu aja sakulah sungsung maka ikam malandau aja gawian..,” jar Tupai sambil manyurung tangan ka Badut.

“Kada minta sangu kah ikam Dut lawan kaka ikam..,” Anang Aspal mahabui. Balum manjawab Badut sudah am Anang Tupai mambarii adingnya duit saratus ribu. Kahimungan Badut dapatny, lajur aja tulak ka sakulah.

Tunggal ikungan bubuhannya bapisah. Anang Tupai lajur maambili Aluh Kaciput baimbai bagawi ka kuta. Utuh Kumandrah lawan Anang Aspal ampah kuta jua handak baurusan kuntrak gawian. Mintu jua lawan warga Kampug Sawa nang lainnya. Nang bagawi kanturan atawa ka pahumaan asing-asingnya tulakan. Kamarian kaina hanyar takumpulan pulang bubuhannya.

Handap kisah, tabalajur Anang Tupai bulik kantur. Aluh Kaciput sungsung manalipun minta ambili awak asa kada nyaman, Anang Tupai lajur haja baizin bulik jua.

“Assalamualaikum..,”

“Wa alaikum salam, sungsung ikam Nang bulik hari ini..,” umanya Tupai, Acil Imah batakun.

“Inggin ma ae. Kaciput kada nyaman awak tadi inya manalipun minta ambili. Lajur ai jua ulun baizin basungsung bulik..,” jar Tupai maulah takajut umanya mandangar calun minantu garing.

“Sudahkah ikam bawa ka duktur nak..,”

“Bah pian ni mun Kaciput kada nyaman awak sadikit haja lajur abut. Ulun maka am bila gagaringan bilang kada tapi dihirani he he he..,” Tupai lakun manggayai si mama.

Kada saapa datang sapida mutur nang dibuati Badut lawan Amang Busu.

“Kada biasanya badua baranak ni tapaimbai bulik. Mana sapida mutur pian Bah, maka baguncingan lawan ading..,” jar Tupai.

“Abah ikam tadi sungsung kamirisan ban, makanya tadi ka Kantur Pambakal sidin diambili Amang Ciput..,” jar Acil Imah lajur ka dapur maulahakan banyu.

“Banyu aja ma ae, wadainya kada usah. Ulun ada nukar gaguduh tadi di parak sakulahan..,” jar Badut.

Kada saapa datang si kuitan mambawa ampat galas banyu tih panas-panas lajur maandakakan ka mija.

“Mana gaguduhnya Tuh, maka pina musti ikam manukarakan gaguduh..,” Amang Busu manakunakan ka Badut.

“Hadangi dahulu Bah lah, ada bagantung di sapida mutur..,” jar Badut lajur aja maambil bungkusan di sapida mutur.

“Ini gaguduhnya, tadi ulun maitihi Kaka Tupai pina kanyamanan makan gaguduh di warung Amang Akin,”

Tanganga batiga baranak malihat wadai untuk pina lembek bakas barandam sudah. “Napa pina kaya ini nak untuknya..,” jar Amang Busu.

“Ulun tadi malihat bubuhannya makan untuk di warung satumat-satumat mancalap gaguduh ka kupi hanyar manyuap. Pina nyaman banar. Supaya kada ngalih ulun nukar untuk sapuluh ulun gabung lawan banyu tih di dalam plastik. Jadi tinggal manyuap aja lagi,” jar Badut kada tahu-tahu. Kuitan lawan kakanya maka am tanganga mandangarakan Badut bapander.()