Nang Bakisah: Amang Isap

Tabarung sama rupanya bubuhan Kampung Sawa hari ahad ini. Kedada nang hauran maka am kamariannya takumpulan di warung Nanang Akin.

“Lawas kada kaliahatan, haur banarkah pian Pa De,” jar Nanang Abay menakuni Pa De Asem nang tabarung dudukan lawan buhannya,

“Iya am Bay ai, sawat kalo lah sabulan sidin ni kada tapi bakarabut lawan kita di sini,” Alin manambahi.

“Sekitar itulah aku kada bekumpulan lawan bubuhan ikam. Repot bener, banyak nang diurusi,” jar Pa De Asem tapuntal-puntal babahasa Banjar.

“Napa tadi diurusi Pa De?”

“Itu nah, bareng Koh Lim ngurusi masalah duit bantuan pemerintah ke kampung ni. Ada nang tidak cocok dipembukuannya. Makanya bareng Koh Lim membetuli laporan di kota,” jar Pa De.

“Bah untung banarlah sawat katahuan badahulu, jaka kada harau nah bisa masuk tivi kampung kita ni,” jar Utuh Kumandrah.

“Iya betul ikam Tuh. Padahal pas diteliti engga ada selisih antara duit masuk sama duit kaluar. Klop semua, tapi lantaran ada salah hitung la jadi kaco. Seolah-olah ada penyimpangan, padahal sama sekali tidak,” jar Pa De pulang.

“Nah tu nah lihati di tivi, ada nang ditangkap pulang. Duit jua paputingngan ihwalnya. Alhamdulillah di kampung kita ni ada nang harat pambukuan kacam Pa De Asem lawan Koh Lim,” jar Nanang Akin maulah takurihing Pa De Asem.

“Tu ada pulang napa pulang. Angin ribut pinanya, di mana lah. Pina banyak rumah runtuh dapatnya angin,” jar Abay maulah mata bubuhannya ka tivi barataan.

“Di banua kita jua pinanya tu. Umalah kasiannya nang ampun rumah, dimapa jua kainanya tu,” jar Alin.

“Kalian jangan sibuk liat tivi aja. Sekarang ini angin jua kenceng kada biasanya,” jar Pa De Asem.

“Harau bujur, mana hari pina mangadap. Pinanya handak hujan pulang ni,” jar Kumandrah malihat ka langit. Angin maka am bamagin ribut. Takirapan parlak mija di Warung Nanang Akin dapatnya.

“Brabau…..,”

Takajut bubuhannya mandangar di atap warung ada nang mangguguri. Sakalinya seng sagabaran. Pinanya bakas takirap takana angin.

“Kasiannya lah, atas rumah siapakah nang takirap ngini,” jar Alin.

“Pinanya rumah urang kampung subalah pang,” jar Abay.

Angin bamagin ribut, maka garuguman pulang ari. Kada saapa di halaman pulang seng sagabar gugur. Batangguhan pulang bubuhannya. Kadada nang bapikiran pang mun ada warga Kampung Sawa nang takana.

“Tu napa pulang Anang Aspal pina badadas ka sini. Ajin nai ada rumah warga ta kana angin ribut,” jar Kumandrah.

“Nah ikam Lin nyamannya pang marotet di sini. Hapi ba mati, kaka bini di rumah maka abut banar mancarii ikam,” jar Aspal malihat kakanya asik marotet.

“Napa garang As, jadi abut,”

“Kaya apa kada abut, atap dapur lingis dapatnya angin ribut, ta kirap barataan,” jar Aspal maulah Alih tanganga.()