Nang Bakisah: Amang Isap

BIBIT puhun habis, kada jadi baduit lajur pusang ai Alin dapatnya. Handak ma akal timbul tasupani. Bagus kada ta supani banar, jakanya duit pakulihan ma-iwaki warga Kampung Sawa nang manulungi inya mambaiki dapur kada diambil Amang Busu, liwar supannya tu pang Alin.

“Bagus duitnya diambil Amang Busu ka lah, jaka tida harau nah tasupani banar pian. Napa sabuting kedada puhun nang sigar. Sabarataan bilang ma-antara,” jar Anang Aspal wayah bapanderan lawan Alin.

“Iya am As ai, inya lantaran kada baduit tu pang lajur aja utak umpat jua garing. Asa manyasal pang aku. Alhamdulillah kita masih baisian mamarina nang haur talang dada haja mun anak buah kada ruus kalakuan,” jar Alin.

“Kita wadah Amang kah Ka. Ulun dangar Badut garing..,”

“Pas banar, aku tadi handak mambawai ikam jua. Tagal kita mahadangi Kaka bini ikam dahulu,” jar Alin nang diakuri Aspal.

Kada saapa datang Aluh Idut lawan Boy, lajur Alin bapadah handak ka rumah Amang Busu. Tulakan badua ba ading ka rumah Busu.

“Assalamualaikum…,”

“Wa alaikum salam. Masuk Lin, AS. Pai, ini sapupu ikam Alin lawan Aspal nah…,” jar busu manyuruhakan masuk lajur mangiyau Anang Tupai.

“Kada biasa badadua ta paimbai ka rumah. Napa hajat nih..,” jar Anang Tupai mangaya-i sapupunya.

“Maelangi Badut, jar garing..,”

“Gegaringan kaya itu ah…,”

“Mang ulun tarima kasih banar, jakanya kada pian ambil duit sumalam dimapakah ulun ma andak muha kayah babuhannya,” jar Alin.

“Biasa haja Lin ai. Inya nang ngaran bujur kada itu dilakuni dahulu, hanyar mat kada jar habar lagi,” jar Busu.

“Garing apa tadi ading ulun..,”

“Ka uyuhan banar rai inya. Kiyau Badut Pay, suruh ka sini nah..,” jar Busu. Bebaya handak ba puat pada kursi, mancungul sudah Badut.

“Handak mambari duit kah pian ka..,” jar Badut malihat Aspal lawan Alin.

“Pai aku mainjam duit dahulu nah, kabalujuran kada basangu tadi..,” jar Alin ka Tupai nang lajur haja maunjuk duit ratusan ribu.

“Nih kada usah mainjam, pakai aja..,” jar Tupai.

“Alhamdulilah, ni Badut kita babagi 50 puluh sorang ha ha ha..,”

“Liwar pian ni Kai ai. Sapupu sorang diakalani jua..,” jar Aspal asa kada nyaman.

Tatawaan bubuhannya malihat kaluan Alin lawan Badut nang lakun kada tahu disupan. Anang Tupai kada kawa babunyi lagi dapatnya.()