Nang Bakisah: Amang Isap

MUN ukara ba inguan ayam, bilang sabarataan warga Kampung Sawa manggawinya. Macam-macam ayam bilangnya ada di kampung nang di Pambakali, Pambakal Ratih ini. Ayam kampung, bangkuk, ketawa, Kalkun, mutiara, kate, ayam hutan sampai ayam nang buntutnya liwar panjang, ada. Langkap tu pang judulnya.

Tagar biar nang kaya iyu, kedada warga nang katuju manyaung apalagi raun sagan besaung ayam di kampung urang.

“Bujur aja aku ni bainguan ayam bangkok. Tagal sa umuran aku kada bisa manyaung,” jar Utuh Ciput wayah dudukan lawan bubuhannya di kantur disa.

“Tahannya pang pian mang. Di mana-mana mun urang katuju ba inguan ayam bangkok pasti haja katuju ba saung,” jar Nanang Abay lakun kada parcaya.

“Kaya itu pang Ciput tu buhannya ai. Inya tu ba inguan ayam bangkok lantaran diamanah hi lawan paguruan kami. Sasuruhannya, baingun. Wayah kapingin makan ayam, sumbalih. Wayah kada ba duit jual. Hinggan di situ aja sasuruhan sidin,” Amang Busu nang manjawabnya.

“Urang bahari nang ai. Napa nang disuruh paguruan nitu pang nang digawi. Jauh banar lawan kenanakan wayah ini,” Pambakal Ratih manambahi.

Mandangar pepadah nitu napa ada bubuhannya anggut-anggut banar rai.

“Tagal dimapa mun ayam tadi ditukari urang sagan ba saung Mang?” Utuh Kumandrah nang ba takun.

“Ta sarah aja lawan nang manukari. Inya lain ampun saurang lagi. Banyak kai ta habar mun ayam tumatan kurungan ku banyak manangnya wayah disaung,” jar Ciput.

Asik bubuhannya ba bahasan masalah inguan tadi. Macam-macam sudah panderannya. Tumatan urusan ma umpani sampai marawat mun musim garingan.

“Sutil aja kalihatannya, tagal mun di jalani ngalih Nang ai,” jar Amang Busu.

“Nah ada napa pulang, pina ada aparat datang ka kantur disa ni..,” jar Alin sambil manunjuk ka halaman kantur.

“Assalamu alaikum…,”

“Wa alaikum salam. Ada nang bisa kami bantu Pak,” jar Pambakal Ratih.

“Kami mau mencari Pak Amang Ciput. Katanya ada di sini,”

“Saya pak, ada apa pak..,”

“Maaf, bapak harus ikut kami ke kantur polisi,”

“Ba dah, dimapa ini urusannya,”

“Ayu ja Put tai, kita sabarataan ka kantur pulisi. Inya mun kada didatangi kada tahu ukaranya,” jar Amang Busu nang dihiihakan bubuhannya.

Handak kisah, sampai bubuhannya di kantur pulisi nang andakannya di kuta.

“Pinanya Amat lawan Badut tu nang di dalam..,”

“Betul Pak, kami terpaksa mengamankan anak bapak,” jar aparat tadi maulah wirai muha Amang Ciput. Mintu jua Amang Busu, napa talihat Badut ada jua.

“Tenang Pak, anak bapak tidak salah..,”

“Amat! Napa pulang nang ikam pa ulah jadi ta ka sini?” jar Ciput ta nyaring.

Gugup banar Amat malihat kuitannya. Mintu jua Badut bilang manggitir batis melihat Amang Busu lawan sapupunya Anang Aspal.

“Sampeyan orang tuanya Amat sama Badut ya. Silah kan duduk Pak,” ujar aparat nang pinanya kumandan bubuhannya.

“Ada apa garang ini pak?”

“Kami terpaksa mengamankan anak Bapak. Karena keselamatannya terancam,”

“Nah iya am, dimapa bisa kaya itu?”

“Anak bapak memberi kabar pada kami kalau di pasar ada judi sabung ayam. Kami gerebek, tapi sayangnya para pelaku tau kalau Amat dan Badut yang melapor. Makanya mereka marah kemudian menyerang anak bapak,”

“Ooooo…..Kami kira Amat lawan Badut ba ulah ukara. Mun sual itu ulun jamin kada papa pa ai. Saya kena nang mendatangi bubuhannya..,” jar Anang Aspal.()