Nang Bakisah: Amang Isap

Badut……Badut….Kaya itu haja nang kawa dipander Acil Imah umanya malihat kalukuan anak. Napa saban kalian bulik sakulah, hingga baju sing rigatan. Ada aja alasannya imbah ditakuni. Nang ta juramba lah, nang manulungi urang lah sampai imbah main bula sapakawanan.

“Imbah anu manyayarik, imbah anu mambari maras. Ngalih ai ngarannya lawan anak,” ujar Acil Imah wayah bapanderan lawan Amang Busu.

“Iya am umanya ai. Lain banar lawan si Tupai nang manurut banar lawan kuitan,” jar Busu.

“Nyata haja lain, Tupai tumatan kenanakan diharagu abah. Napa haja nang dikahandakinya ditulusakan aja. Ulun asa gagairan jua, tagal imbah ganal sampai bagawi harau manuntung maasinya,”

“Assalamualaikum..,”

“Wa alaikum salam. Kada biasanya ikam sungsung bulik nang,” jar Imah ka Anang Tupai nang pina kurihing-kurihing sambil mancium tangan kuitan.

“Ka balujuran sungsung tuntung ulun ma ajar, Aluh Kaciput manalipun minta ambili di gawian,” jar Tupai.

“Mana Kaciputnya?”

“Ada ai tu lagi basasimpun tatukaran,”

“Assalamualaikum..,”

“Wa alaikum salam. Pina banyak tatukaran ikam Put,”

“Iya am nah, ulun asa handak bamasakan di sini. Lawas kada makan wadah pian,”

“Pas banar, aku balum bamasak jua. Ayu nah kita ka dapur an,” jar Imah lajur maangkati balanjaan calun minantu.

Kada saapa datang Badut lawan Amat. Lakun kenanakan badua bahasabat ini begayaan haja.

“Assalamualaikum…pina langkap nusianya. Pinanya pacangan makan nyaman ni kita..,” jar Badut sambil manyurung tangan ka kuitan lawan dangsanak tuha.

“Ae ikam lajur ka sini Mat, kada dicarii abah lawan mama ikam kah..,” jar Anang Tupai.

“Kada ka ae, ulun tadi sudah ba padah. Pas banar pinanya Acil ulun ada jua di sini,” jar Amat.

Kanapa jua kah Badut lajur kipuh. Garu sana..garu sini. Lakun minyang banar awak.

“Kanapa Dut maka ikam bagimang haja. Ku lihat mulai di jalan tadi satumat-tumat ba garu,” jar Amat.

“Iya am Mat ai, kada paham jua nah aku. Maka gatal banar awak,”

“Ayu pang lapas baju ikam nak,” Amang Bus lajur ba parak.

Pas jua ai, biyal ganal-ganal bilang hibak di balukuk. Ba para Acil Imah lawan Kaciput mandangar pina tumbur di luar.

“Ini liman ngarannya Dut ai. Ayu nah ku kasai lawan minyak kaya putih,” jar Kaciput nang lajur maambil minyak di dalam tasnya.

Wayah bubuhannya kipuh mahurung Badut, Anang Tupai maka mamariksa baju adingnya. Tunggal buncu an diitihinya.

“Bah kadanya liman pang ai. Ini ada ulat bulu di dalam baju kaya apa kada ba bial awak,”

Tatawaan bubuhannya malihat ulat bulu masuk ka dalam baju nang disantak Badut. ()