Nang Bakisah: Amang Isap

Ngaran banyak puhunnya lah, di Kampung Sawa ada wayahnya buah nang kada ba buah di dukuh lain, ada. Badahulu masak kaya itu pang nang rajin. Macam musim buah durian tadi, di kampung lain hanyar ma mantil di Kampung Sawa ba mula guguran. Kaya itu jua buah nang lain.

Badahulu masak badahulu lumusnya. Tagal ada aja sambungannya. Durian lumus, tiwadak masakan.

“Nyaman jua lah di kampung kita ni. Nang ngaran buah tu badahulu tarus pada di kampung lain. Cair tu pang bubuhan nang maanduk buah kacam Amang Bisu,” jar Anang Aspal wayah dudukan di warung Akin.

“Ikam gin ai ba kukut jua. Bujur aja ta murah pada di pasar tagal banyak, ya kalu..,” jar Kumandrah kayah Anang Aspal.

“Alhamdulillah, kada ta salah aruah kuitan bahari katuju ba tanaman. Cukup banar mun sagan walanjaan,” jar Aspal takurihing.

“Untung ikam As ai. Kuitan sudah kadada tagal ada marina ikam nang kada sing intatan mangaduhi ikam lawan Alin,” jar Kumandrah.

“Iya am kada tahu jua kaya apa kami mun kada digaduhi Amang Busu. Bisa kada kekaruan ha ha ha..,” jar Aspal.

“Jar Alin semalam, tiwadak parak lumus lah. Nangka pulang mahadang, mantap banar tu..,” jar Nanang Abay.

“Bujur, semalam aku lawan Alin malihati. Banyak pang nang pina bamula harum. Insya Allah isuk kalu kami ba putik,” jar Aspal.

“Nah, ada tu rajaki kita buhannya ai..,”

“Biris aja, isuk kamarian ku bawaakan ka sini. Kabalujuran kawan ku nang di pasar handak ba elang jua,” Aspal bahabaran.

Kada saapa datang Anang Tupai lawan Anang Ladung ba mutur ganal.

“Pina asik banar buhan ikam ma rotet..,” jar Ladung lajur duduk mamasan kupi.

“Pabila datang Dung..,”

“Hanyar ha, ini pang ta dapat Tupai tadi di lurung. Lajur ai ka sinian, asa dandaman aku lawan bubuhan ikam,”

“Kabalujuran ikam ada, isuk kami handak ba pista nangka di sini,”

“Ouuu balum musimnya maka ada nangka sudahlah,”

“Jangan hiran ikam Dung ai, marina ku bahari banyak banar batanaman nangka. Imbah anu, di lain hanyar mamantil, ampun sidin ba mula masakan,” Anang Tupai nang manyahuti.

Handap kisah, kamarian isuknya datangnya bubuhannya. Bujur jar Aspal kawannya nang di pasar gonol Utuh Bakuan lawan Anang Kardus ada jua.

“Alhamdulillah takumpulan sudah. Ini nah kubawaakan nangka belulang nang panyamannya. Ikam mai Kin ai nang manyianginya..,” jar Aspal sambil maangkat nangka sing ganalan ka palataran rumah Akin. Kada sa apa datang ai buah nangka ba piring. Sabuting piring hibak lawan nangka sabuting jua papiringan nang baisi minyak lamak.

“Ayu sudah dimakani..,”

Rupanya nang ngaran Utuh Bakuan lawan Anang Kardus ni lakun penahunya.

“Lawas banar kada makan nangka..,” jar Bakuan lajur manjuhut ka nangka.

Nang maulah bubuhannya ta nganga nangka tadi dipalitnya dahulu ka minyak lamak hanyar disulum. Mintu jua Anang Kardus. Nyata haja bubuhannya tetawaan, tagal kada jua handak managur. Sapiring lingis dapatnya nang badua ni, mintu jua minyak lamaknya bakarik.

“Dasar nyaman banar nangka ikam ni As ai..,” jar Bakuan, tagal limut bibir dapatnya minyak.

“Bubuhan ikam nih ganjil jua, maka nangka dipalit ka minyak. Dimapa jua rasanya?” jar Tupai nang patuh jua lawan Bakuan.

“Imbah pang dimapa?”

“Sayup batakun ikam. Minyak ni hagan tangan mun kada handak kana gatahnya, jadi tangan ni bebaya aja dipaliti dahulu hanya mamakan ka nangka,”

Manapak ka dahi nang badua ni, bamagin nai buhannya tatawaan.()