Nang Bakisah: Amang Isap

Anang Aspal lawan Anang Tupai tumatan kenanakan bilang rakat banar. Sapapalih wajar haja inya basapupuan alias kuitan badangsanak. Mun Anang Aspal tumatan halus di Kampung Sawa haja, lain Anang Tupai tumatan halus sudah digaduh kainya Haji Kadut urang sugih nang badagang di kuta.

Tagal nang ngaran basapupuan Anang Aspal rancak jua ba malam wadah Anang Tupai.

“Bujur aja inya badua tu rakat banar. Tagal tatap ai jua imbah anu bapakalahan. Ta banyak Aspal pang nang ta pakalah,” jar Alin mamaderakan adingnya wayah dudukan di Warung Nanang Akin lawan buhannya.

“Kakurang labih ikam Lin ai, mantang dangsanak anum rancak banar ku lihat ikam manggawi Anang Aspal,” jar Kumandrah lajur mangalakak.

Panas masih banyu kupi, datang Anang Tupai baguncingan sapida mutur lawan Anang Aspal.

“Tang manaan bubuhan ikam ni, pina satil banar ba pakaian..,” jar Nanang Abay.

“Kami ini basinghaja ka sini. Handak mambawai bubuhan ikam maelangi kawan kami bamakanan,” jar Tupai.

Mandangar bamakanan cagat talinga Alin. Lajur haja inya batakun wadah siapa?

“Urusan bamakanan ngalih manampiknya, pabila?” jar Alin.

“Daminian pang, ayu nah kita barataan tulakan ka kuta ka rumah Diang Mayang,”

“Cucuk haja mambawai kami, ka rumah babinian sakalinya. Wani kada babawaan, katahuan Aluh Kaciput etang talinga tu pang hik…hik..hik..,” ujar Utuh Kumandrah lajur tatawaan buhannya.

“Kada usah banyak pander, umpatkah kada..,” jar Aspal nang pina kahandakan banar sudah tulakan.

“Ayu ja kami umpatan, tagal aku manalipun bini dahulu,” jar Kumandrah nang dihiihakan buhannya.

Handap kesah tulakan bubuhannya sabarataan ka kuta ka rumah Diang Mayang. Takajut jua pang buhannya di sana sudah ada Aluh Kaciput.

“Nah iya tu, ramiam kita,” jar Kaciput malihat bubuhannya datangan.

“Cucuk haja pang kami uluti si Tupai tanang haja, sakalinya ikam ada jua di sini,” jar Kumandrah.

Pander pander, sakalinya Diang Mayang ni masih bakula lawan Aluh Kaciput. Imbah itu kawan sagawian pulang.

“Makanannya sudah siap, ayu kita lajur aja bamakanan,” jar Diang Mayang nang kada kalah langkarnya lawan Aluh Kaciput.

Himung banar Alin mandangar wayahnya bamakanan. Hancap inya bapuat mairingi Diang Mayang lawan Kaciput ka dapur. Tiga buah mija makan hibak lawan makanan, tumatan nasi, sambal, iwak langkap lawan gangannya. Asing-asingnya ai duduk mahadapi makanan di mija nang sakalinya kawa dipulas.

Asing-asingnya mangukut nasi. Utuh Kumandrah pang nang tanyaman, duduk bahadapan lawan iwak mas ba pangnggang. Di hadapan Alin gangan manis lawan sambal, nyata haja sudah urusan iwak tadudi tarus sampai iwaknya habis, Alin kada kabagian.

Kada papa pang, ngarannya mija kawa dipulas lah. Imbah handak maambil iwak ma mulas ka mija. Bebaya handak sampai di hadapannya dipulas buhannya meja tadi. Sambal lawan gangan pulang nang di hadapan. Kaya itu tarus sampai iwak lingis dapat buhannya.

“Napa Lin gangan lawan sambal haja nang ikam makan, kada katuju iwak ba banam kah,” jar Kaciput nang duduk bahigaan lawan Anang Tupai.

“Kada jua pang, makan haja aku ka iwak. Tagal hari ini pina pahit liur,” jar Alin pina masam. Bubuhannya maka takurihing mandangar Alin pina kada basalira.

“Inya dasar kaya itu Put ai. Ba wayah, mun kada handak makan ba iwak biar iwak nyaman kada hiran-hiran tu pang inya. Macam hari ini nah,” jar Kumandrah maulah bubuhannya kelikikan.

Dalam hati Alin bamamai aja, “Purun banar bubuhannya manggawi aku. Saban mamulas ka mija handak mangibit iwak, katiya gangan manis lawan sambal di dahapan..,”()