Nang Bakisah: Amang Isap

Sabulanan ini bubuhan babinian warga Kampung Sawa gagarunuman. Nang digarunum akan sama. Lumbuk pa rawit sing larangan.

“Ku kira wadah kita haja puhun lumbuk mati taranbam baah, sakalinya sa banua an sama. Lajur ai haraga lumbuk bilang maalahi iwak,” jar Acil Amah wayah mahurung paman sayur kuliling lawan bubuhan babinian di kampung.

“Iya am Cil ai. Maka wayah-wayah kadada nang bajual, ta paksa ta pakai sambal ulahan pabrik. Maka asa lain lawan liur kita,” jar Aluh Idut umpat manggarunum.

Mintu jua nang lainnya, paman sayur bilang banyak tanganga mandangarakan bubuhan babinian Kampung Sawa nang pina garigitan banar lawan pamarintah.

“Kaya apa kah jua bubuhan abah-abah kita ni lah, maurusi lumbuk aja bilang kangalihan. Apalagi maurusui nang lainnya,” jar Acil Imah umpat jua mamamai.

“Napa kah digarunumakan. Lumbuk larang? Kada kawa jua kita ni manyalahakan pamarintah. Tanah sing luasan di kampung kita ni, banyak asalnya puhun lumbuk. Tagal dapatnya banjir, mati an. Imbah itu kita ni baranai aja jua. Cuba pang kita batanaman pulang,” Pambakal Ratih tang mancungul umpat ba pander.

“Eeh pambakal sakalinya. Bujur pang pian pambakal lai. Ayu ai kita ba mula pulang batanam lumbuk. Pian kawakah maadaakan paungnya,” jar Acil Amah.

“Kawa banar. Tu di Kantur Disa ada sudah paung lumbuk. Tinggal maambil mun handak ba tanam,”

Himung bubuhan babinian mandangar, asing-asingnya lajur ka kantur pambakal. Ada nang sapuluh batang, ada jua nang sampai saratus batang paung lumbuk pangrawit.

Mun dipadahakan sayup bujur aja jua. Sabujurnya mun ba tanam lumbuk wayah ini, kaina-kaina kada pacangan kangalihan mangutup lumbuk wayah makan.

“Jaka tumatan sumalam-sumalam ba tanam lumbuk, kada gagarunuman wayah ngalih mancari,” jar Utuh Kumandrah ka nang bini wayah batanaman lumbuk di higa rumah.

“Betatanaman ini kadada nang sayup pang Ka ai. Kada sumalam, hari ini. Kada hari ini isuk, kada papa jua,” jar Ning Langkar babahasan.

“Kada kaya itu pang ding ai, ikam tu bilang saban kamarian ba udak tanaman. Tagal kambang ka tiya kambang, jaka kambang..,” balum tuntung ba pander sudah am Ning Langkar badiri sambil ba kacak pinggang.

“Napa jar pian, handak mancari balu kambang kah. Sini nah ulun mahiritnya..,” jar Ning Langkar lajur manyingsing ka tangan.

“Oooo sabar ding…,”

“Kadada sabar-sabaran lagi. handak baa pa pian,”

Ta undur Utuh Kumandrah malihat bini sarik. Undur-undur tarus, kada kaingatan lagi mun di balakangnya parit mahadang. Dabau, tacabur kawal ka parit nang sadang bau banyunya. Napa lagi jutut awak ta cabur di parit.()