Basalamatan

Nang Bakisah: Amang Isap

Sapida mutur hanyar tagal sudah maajab, kaya itu pang kisahnya sapida mutur ampun Amat anak Amang Ciput. Sabujurnya kadada nang salah lawan sapida mutur tadi, inya lantaran Amat tu kada paingatan, wayah mahidupi kunci kuntaknya kada di on akan.

Nah, gara-gara nintu jua Acil Amah umanya si Amat tumbur banar, nyata aja Amang Ciput nang ditumburi.

“Makanya ampun urang bahri jangan ditetinggal. Kaya itu pang jadinya..,” jar Acil Amah gagarunum wayah malihat Amat imbah dihabarakan kamugukan sapida mutur.

“Sudah ai jangan tapi dihual lagi, ngarannya sudah lipat watu tu kada pang ba bulik pulang..,” jar Ciput.

Tagal Acil Amah kada jua ampih manggarunum. Tatap dikajal ampun sidin kayah lakinya.

“Urang bahari tu mun mahanyari napa aja kah pasti badua salamat. Ini kada, tumatan di tuku lajur haja dilajak. Han pas jua kalu, katiya muguk..,”

“Aju ja Ding ai, isuk kita salamatan. Kada sayup jua kalu lagi..,”

“Bagus ai mun mintu, tampulu isuk hari Ahad nyaman kemarian ini ka pasar babatukar parampahan..,” jar Acil lajur mambawai Aluh Kaciput ka pasar.

“Napa iwaknya ka, mun jar ulun baik kita manukar ayam kampung. Nyaman bubuhannya makanan,” jar Aluh Kaciput.

“Bagus jua pang kaya itu, tagal kita singgah dahulu ka rumah mama. Kaina sidin sarik mun kada dihabari badahulu,”

Handap kisah, sampai wayahnya badua salamat. Rami bubuhannya takumpulan di Rumah Utuh Ciput. Anang Ladung nang kabalujuran kada ba dinas ada jua, mun bubuhan Alin, Anang Abay, Utuh Kumandrah, Anang Tupai nyata aja sudah kada kawa baindah.

Asa panat duduk, jar Alin, kelalawasan babacaannya. Parut pina padih banar baistilah kada makan di rumah.

“Sabar pang, satumat lagi tuntung am sudah..,” jar Utuh Kumandrah mambisiki Alin. Bujur pang jar Kumandrah dasar satumat imbah ngitu tuntung badua. Wayahnya basusurangan. Nang kaya biasa jua, Alin tu pang kumandan basasurung. Titik liur inya malihat pina mambari kapingin iwak habang masak habangnya.

Dasar lapar lah, malihat piring iwak pina dua tatakan lajur aja Alin maminggirakan pas di higanya ba duduk. “Dua tatakan pacangan aku mamukul iwaknya..,” dalam hati inya bepander.

“Ayu dimakani..,” mintuha Amang Ciput, Haji Amak manyuruhakan. Lakun dikumandu lajur aja asing-asingnya manuang nasi ka piring nang baisian iwak hayam. Mintu Alin, lajur haja jubung piringnya.

“Pina lindung kucing piring ikam Lin lah…,” jar Utuh Kumadrah.

“Bujur banar wal lai, baistilah aku kada makan turun pada rumah tadi…,” jar Alin.

Kenapakan bubuhan Anang Abay lawan Anang Tupai tatawa-tatawa aja malihat lakun Alin.

Asing-aing manyuap ka nasi. Dasar masakan Acil Amah tuharat lah, nyaman banar tu pang bubuhannya makan. Alin kada kisah lagi, tutuy banar inya ka nasi.

“Kada ba iwak kah ikam Lin …..,” Amang Ciput nang managur.

“Ba iwak Mang ai, tagal ulun ni biasa iwaknya badudi..,” jar Alin maulah bubuhannya tetawaan.

Habis nasi di piring mancungkung dua tatakan iwak di piring Alin. Cap lajur haja di gugutnya iwak tadi.

“Badah napa ini, pina karas banar..,” kada sadar Alin basuara, sabarataan urag cangangan wadah inya.

“Nyata haja karas Lin ai, inya nang ikam gugut tu laus ha ha ha…,” jar Nanang Abay nang tetawaan malihat muha Alin pina kalas.()